Bugun Xorazm Ma'mun akademiyasida o‘zbek va turkman xalqlarining mushtarak madaniyati va ma'rifatining yirik namoyondasi, shoir, faylasuf Maxtumquli tavalludining 300 yilligiga bag‘ishlangan konferensiya bo‘lib o‘tdi. Mazkur konferensiya O‘zbekiston Respublikasi Prezidentining 2024-yil 9-fevraldagi “Buyuk turkman shoiri va mutafakkiri Maxtumquli Firog‘iy tavalludining 300 yilligini keng nishonlash to‘g‘risida”gi PQ-76-sonli Qarori asosida O‘zbekiston Respublikasi Fanlar akademiyasi va Xorazm Ma'mun akademiyasi hamkorligida o‘tkazildi. Bu yil YUNESKO rahnamoligida nafaqat o‘zbek va turkman yurtida, balki butun dunyo bo‘ylab Maxtumquli tavalludining 300 yilligi nishonlanmoqda. Bu esa, o‘z navbatida, shoirning butun dunyo adabiyoti va madaniyati tarixida o‘z o‘rnini egallagan ijodkor ekanligidan dalolat beradi. Xorazm Ma'mun akademiyasi tomonidan o‘tkazilgan mazkur konferensiya esa o‘zbek va turkman xalqi birdam va do‘stligida qadimdan muhim ro'l o‘ynab kelgan Maxtumquli ijodining bugun ham ikki xalq avlodlarining shoir ijodiga mehr-muhabbati so‘nmas va abadiy ekanligini yana bir bor isbotlab turibdi.
Konferensiya qiziqarli savol-javoblar, bahs-munozaralarga boy bo‘ldi, unda talabalar, o‘quvchi yoshlar, qiziquvchi tadqiqotchilar ham qatnashdilar va o‘zlarini qiziqtirgan savollarga javob oldilar.