VAZIRLAR MAHKAMASINING QARORI 09.11.2004 Y. №-532

22-06-2017 Постановления Кабинета Министров Республики Узбекистан

ХОРАЗМ МАЪМУН АКАДЕМИЯСИНИНГ 1000 ЙИЛЛИГИНИ НИШОНЛАШ ТЎҒРИСИДА

Жаҳон илм-фани ва маданияти ривожига улкан ҳисса қўшган Хоразм Маъмун академиясининг бой илмий меросини ҳар томонлама ўрганиш, ёш авлод қалбида миллий ифтихор ва мамлакатимизнинг тарихий ўтмишига чуқур ҳурмат туйғусини камол топтириш, шунингдек Хоразм Маъмун академиясининг 1000 йиллик юбилейи юксак ташкилий даражада нишонланишини таъминлаш мақсадида Вазирлар Маҳкамаси қарор қилади:

ЮНЕСКО Бош конференциясининг 32-сессиясида Хоразм Маъмун академиясининг 1000 йиллигини нишонлаш бўйича юбилей тадбирларида ЮНЕСКОнинг иштирок этиши ҳақида қарор қабул қилинганлиги маълумот учун қабул қилинсин.
Хоразм Маъмун академиясининг 1000 йиллигини нишонлашга тайёргарлик кўриш ва уни ўтказиш бўйича Республика ташкилий қўмитаси таркиби ҳамда тадбирлар дастури 1 ва 2-иловаларга мувофиқ тасдиқлансин.

Ташкилий қўмита (Ш.М.Мирзиёев) Хоразм Маъмун академиясининг 1000 йиллигини нишонлашга тайёргарлик кўриш ва уни ўтказиш бўйича 2-иловага мувофиқ чора-тадбирлар комплексининг амалга оширилишини таъминласин.

Ўзбекистон Республикаси Фанлар академияси Олий ва ўрта махсус таълим вазирлиги, Республика «Маънавият ва маърифат» маркази, «Ибн Сино» ҳамда «Олтин мерос» жамғармалари, Хоразм вилояти ҳокимлиги билан биргаликда 2005 йил октябрь ойида «Хоразм Маъмун академияси ва унинг жаҳон илм-фани тараққиётидаги ўрни» мавзусида халқаро илмий конференция ўтказиш бўйича ташкилий чора-тадбирларни таъминласин.
Хоразм вилояти ҳокимлиги манфаатдор вазирликлар, идоралар, жамоат ташкилотлари ҳамда жамғармалар билан биргаликда Хоразм Маъмун академиясининг 1000 йиллигини нишонлаш доирасида Урганч ва Хива шаҳарларида ўтказилиши белгиланган тадбирларни амалга оширсин.
«Ўзбектуризм» миллий компанияси Хоразм Маъмун академиясининг жаҳон илм-фани ва маданияти ривожига қўшган тарихий ҳиссасининг кенг реклама ва тарғиб қилинишини таъминласин.
Ўзбекистон матбуот ва ахборот агентлиги, «Ўзтелерадио» компанияси, Ўзбекистон Миллий ахборот агентлиги, оммавий ахборот воситалари Хоразм Маъмун академиясининг 1000 йиллигини нишонлашга тайёргарлик кўриш ва унинг ўтказилишини кенг ёритсинлар.
Мазкур қарорнинг бажарилишини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.

Вазирлар Маҳкамасининг Раиси И. КАРИМОВ

Тошкент ш.,

2004 йил 9 ноябрь,

532-сон

Вазирлар Маҳкамасининг 2004 йил 9 ноябрдаги 532-сон қарорига
1-ИЛОВА

Хоразм Маъмун академиясининг 1000 йиллигини нишонлашга тайёргарлик кўриш ва уни ўтказиш бўйича республика ташкилий қўмитаси

ТАРКИБИ

1.‎	Мирзиёев Ш.М.‎	Ўзбекистон Республикаси Бош вазири, ташкилий қўмита раиси ‎
2.‎	Қосимов Р.С.‎	Ўзбекистон Республикаси Бош вазирининг ўринбосари — Олий ва ўрта махсус таълим вазири, ташкилий қўмита раиси ўринбосари‎
3.‎	Бобожонов И. ‎	Хоразм вилояти ҳокими, ташкилий қўмита раисининг ўринбосари ‎
4.‎	Султонов Х.М.‎	Ўзбекистон Республикаси Президентининг Давлат маслаҳатчиси (келишув асосида) ‎
5.‎	Азизхўжаев А.А.‎	Ўзбекистон Республикаси Маданият ва спорт ишлари вазири ‎
6.‎	Аъзамов Қ. ‎	Республика «Маънавият ва маърифат» маркази раҳбари ‎
7.‎	Каримов А.‎	«Олтин мерос» жамғармаси раиси‎
8.‎	Жўраев Т.И.‎	Халқ таълими вазири ‎
9.‎	Бобокалонов З. ‎	Ички ишлар вазирининг ўринбосари ‎
10.‎	Икромов А. ‎	Ўзбекистон Республикасининг ЮНЕСКО ишлари бўйича миллий комиссияси масъул котиби ‎
11.‎	Йўлдошев Б.С.‎	Ўзбекистон Республикаси Фанлар академияси президенти‎
12.‎	Эргашев Ш.‎	Ибн Сино жамғармаси раиси‎
13.‎	Норов В.И. ‎	Ташқи ишлар вазирининг биринчи ўринбосари‎
14.‎	Шоғуломов Р.Ш.‎	Матбуот ва ахборот агентлигининг бош директори ‎
15.‎	Кўчимов А.К.	«Ўзтелерадио» компанияси раиси‎
16.‎	Ҳазратқулов М.‎	Миллий ахборот агентлиги бош директори‎
17.‎	Тохтаев А.Р. ‎	«Давархитектқурилиш» қўмитаси раиси ‎
18.‎	Избасаров А.Ф.‎	Ўзбекистон алоқа ва ахборотлаштириш агентлиги бош директорининг биринчи ўринбосари ‎
19.‎	Орипов А. ‎	Ўзбекистон Ёзувчилар уюшмаси раиси ‎
20.‎	Мурод Муҳаммад Дўст ‎	«Ўзбеккино» Миллий агентлиги бош директори ‎
21.‎	Ҳусанбоев Б.М. ‎	«Ўзбектуризм» миллий компанияси раиси ‎
22.‎	Сафаров К. ‎	Маъмун академияси раиси ‎
23.‎	Қўзиев Т. ‎	Бадиий академия раиси ‎
24.‎	Убайдуллаев Б.‎	Ўзбекистон ёшларининг «Камолот» ижтимоий ҳаракати марказий кенгаши раиси‎
25.‎	Мадаминов М.‎	Хоразм вилоятининг Хива тумани ҳокими‎

Вазирлар Маҳкамасининг 2004 йил 9 ноябрдаги 532–сон қарорига
2-ИЛОВА

Хоразм Маъмун академиясининг 1000 йиллигини нишонлашга тайёргарлик кўриш ва уни ўтказиш тадбирлари

ДАСТУРИ

Т/р‎	Тадбирлар мазмуни‎	Муддатлари‎	Бажариш учун масъуллар‎
‎I. ЮНЕСКО иштирокидаги халқаро тадбирлар
1.‎	«Хоразм Маъмун академияси ва унинг дунё илм-фани тараққиётидаги ўрни» мавзуида халқаро илмий конференция ўтказиш‎	2005 йил ‎октябрь ‎	Фанлар академияси, ‎Ташқи ишлар вазирлиги, ‎Бадиий академия, ‎Хоразм вилояти ҳокимлиги ‎
2.‎	«Хоразм Маъмун академияси ва унинг дунё илм-фани тараққиётидаги ўрни» мавзуида халқаро илмий конференция маърузалари тезисларини эълон қилишга тайёрлаш ‎	2005 йил ‎октябрь- ‎ноябрь‎	ЮНЕСКО ишлари бўйича республика ‎миллий комиссияси‎
3.‎	Хоразм Маъмун академиясини замонавий компьютер техникаси билан жиҳозлаш‎	2004 йил ‎ноябрь- ‎декабрь ‎	ЮНЕСКО ишлари бўйича республика ‎миллий комиссияси ‎
4.‎	Хоразм Маъмун академиясининг 1000 йиллигига бағишланган тантанали байрам тадбирларини ўтказиш‎	2005 йил ‎октябрь- ‎ноябрь ‎	Маданият ва спорт ишлари вазирлиги, ‎‎«Ўзбекнаво» эстрада бирлашмаси, ‎Хоразм вилояти ҳокимлиги ‎
‎II. Илмий-тадқиқот ва ноширлик ишлари‎
5.‎	Хоразм Маъмун академиясининг миллий ва жаҳон фани хазинасига қўшган ҳиссасини очиб беришга доир илмий тадқиқотларни ташкил этиш ва ушбу ишларнинг натижаларини нашр этиш‎	2004-2005 ‎йиллар ‎давомида ‎	Олий ва ўрта махсус таълим вазирлиги, ‎Халқ таълими вазирлиги, ‎Фанлар академияси ‎
6.‎	Хоразм Маъмун академияси ҳақида илмий ва бадиий асарларни чоп этиш‎	2004-2005 ‎йиллар ‎давомида ‎	Фанлар академияси, ‎Ўзбекистон матбуот ва ахборот агентлиги, ‎«Шарқ» матбаа компанияси ‎
7.‎	Хоразм Маъмун академияси тўғрисида илмий-оммабоп ҳужжатли фильм яратиш‎	2005 йил ‎	«Ўзбеккино» Миллий агентлиги, ‎Хоразм вилояти ҳокимлиги ‎
8.‎	«Хоразм воҳасининг таниқли илм-фан намояндалари сиймоси тасвирий санъат асарларида» кўргазмасини ташкил этиш‎	2004-2005 ‎ йиллар ‎ давомида‎	Хоразм вилояти ҳокимлиги, ‎Бадиий академия ‎
9.‎	Хоразм Маъмун академиясининг 1000 йиллигига бағишланган почта маркалари, конвертлар чиқариш ва уларнинг савдосини ташкил этиш‎	2005 йил ‎	Ўзбекистон алоқа ва ахборотлаштириш ‎агентлиги, Ўзбекистон матбуот ва ‎ахборот агентлиги‎
‎‎III. Оммавий-маърифий ва ташкилий тадбирлар
10.‎	Ўқув юртларида Хоразм Маъмун академияси олимларининг хизматларини тарғиб этишга йўналтирилган маърифий курсларни ташкил этиш‎	2004-2005 ‎йиллар ‎давомида ‎	Олий ва ўрта махсус таълим вазирлиги, ‎Халқ таълими вазирлиги, ‎Фанлар академияси ‎
11.‎	Хоразм Маъмун академиясининг 1000 йиллигини нишонлашга тайёргарлик кўриш ва уни ўтказиш билан боғлиқ тадбирларни акс эттирувчи туркум телекўрсатувлар, радиоэшиттиришлар ташкил этиш, оммавий ахборот воситаларида мунтазам равишда материаллар бериб бориш ‎	2004-2005 ‎ йиллар ‎ давомида ‎	Ўзбекистон матбуот ва ахборот агентлиги, ‎«Ўзтелерадио» компанияси, ‎Ўзбекистон Миллий ахборот агентлиги, ‎«Жаҳон» ахборот агентлиги ‎
12.‎	Хоразм Маъмун академиясининг жаҳон тамаддунини ривожлантиришдаги тарихий ҳиссасини чет элда ва мамлакат ичида кенг реклама ва тарғиб этишни таъминлаш‎	2004-2005 ‎ йиллар ‎давомида ‎	«Ўзбектуризм» миллий компанияси, ‎Ташқи иқтисодий алоқалар агентлиги, ‎ Фанлар академияси‎
13.‎	Хоразм Маъмун академиясининг 1000 йиллиги рамзини тайёрлаш‎	2005 йил ‎	Бадиий академия, ‎Маданият ва спорт ишлари вазирлиги ‎